ខេត្តបន្ទាយមានជ័យ ៖ ក្រុមហ៊ុន ថាប់ រស្មី មានកិត្ដិយសសូមជម្រាបជូនសាធារណជន និងបណ្ដាញសារព័ត៌មានជាតិ និងអន្ដរជាតិ មេត្ដាជ្រាបថា៖ ជំវិញការចុះផ្សាយរបស់គណនីហ្វេសប៊ុកឈ្មោះ គេហទំព័រ ស៊ីអេចខេ-ញូស៍.ខម CHK-News.com មានចំណងជើងថា «កសិករយ៉ាប់ហើយបើចឹងនោះក្រុមហ៊ុនថាប់រស្មី (ឧកញ៉ាណាន់) នៅខេត្ដបន្ទាយមានជ័យ មានអំណាចធំម្លេសចាប់បង្ខំពលរដ្ឋដឹកគោ ក្របី លក់ដូរតិចតួច បង់លុយរាប់លាន ខណៈក្រុមហ៊ុនមានតែច្បាប់នាំគោ ក្របីពីថៃ តាមច្រករបៀងអូរបីជាន់ ទៅវៀតណាម តែធាតុពិតគឺ..» កាលពីថ្ងៃទី១១ ខែសីហា ឆ្នាំ២០២៤ ម្សិលមិញនេះ។នេះតាមការចុះផ្សាយដោយគ្មានមូលដ្ឋាន និងគ្មានប្រភពច្បាស់លាស់ របស់គណនីហ្វេសប៊ុកខាងលើ ជាការមូលបង្កាច់បង្ខូចនូវ សេចក្ដីថ្លៃថ្នូរ និងកិត្ដិយស របស់ក្រុមហ៊ុន និងលោកឧកញ៉ា យ៉ាងធ្ងន់ធ្ងរ ដែលផ្ទុយពីក្រមសីលធម៌ វិជ្ជាជីវៈអ្នកសារព័ត៌មាន បង្កឱ្យមានការយល់ច្រឡំ។ជាក់ស្ដែងសាវតានៃអង្គហេតុ កាលពីថ្ងៃទី៣១ ខែកក្ដដា ឆ្នាំ២០២៤ ក្នុងនាមក្រុមហ៊ុនដែលមានច្បាប់អនុញ្ញាតត្រឹមត្រូវលើការនាំឆ្លងកាត់-នាំចេញសត្វគោ ក្របី បានទទួលដំណឹងថា មានការនាំចូល សត្វគោ ក្របី ខុសច្បាប់ តាមច្រករបៀងស្ថិតនៅក្នុងស្រុកម៉ាឡៃ ខេត្ដបន្ទាយមានជ័យ ក្រុមហ៊ុនបានធ្វើសេចក្ដីរាយការណ៍ ជូនអាជ្ញាធរមានសមត្ថកិច្ច និងមន្ដ្រីគយ ដើម្បីធ្វើការទប់ស្កាត់ការនាំចូល សត្វ ដោយគ្មានច្បាប់អនុញ្ញា ដែលជាបទល្មើសផ្ទុយពីច្បាប់លើការគ្រប់គ្រងនាំចូលសត្វគ្រប់ប្រភេទ។ ក្រោយពីបានធ្វើសេចក្ដីរាយការណ៍ កម្លាំងសមត្ថកិច្ចចម្រុះរួមមាន ព្រះរាជ្ញារងខេត្ដបន្ទាយមានជ័យ មន្ដ្រីគយ កងរាជអាវុធហត្ថ ពេទ្យសត្វ និងមន្ដ្រីនគរបាល បានធ្វើការចុះអនុវត្ដ និងបង្ក្រាបទាន់ពេលនៅនឹងកន្លែង ហើយបានចាត់វិធានការទៅតាមផ្លូវច្បាប់ បង់ពន្ធជូនរដ្ឋស្របតាមនីតិវិធី។ចំពោះខ្លឹមសារ ដែលធ្វើការចុះផ្សាយជាព័ត៌មាន មានចរិតមូលបង្កាច់ ផ្ទុយទៅនឹងទិដ្ឋភាពពិត ដោយបានចោទប្រកាន់ថា លោកឧកញ៉ា ធ្វើការទាមទារលុយពីប្រជាពលរដ្ឋ ៥លាន-១០លាន រៀល នោះ គឺជាព័ត៌មានដែលគ្មានមូលដ្ឋាន និងប្រភពច្បាស់លាស់នោះទេ។សូមអង្គភាព គេហទំព័រ ស៊ីអេចខេ-ញូស៍.ខម CHK-News.com មេត្ដាពិនិត្យ និងធ្វើការកែសម្រួល នូវខ្លឹមសារ និងអត្ថបទព័ត៌មានដែលបានចុះផ្សាយឡើងវិញ ក្នុងករណី មិនព្រមធ្វើការកែសម្រួលខ្លឹមសារ រាល់អត្ថបទដែលបានចុះផ្សាយដូចករណីខាងលើនេះទេ ក្រុមហ៊ុន ថាប់ រស្មី នឹងចាត់វិធានការទៅតាមនីតិវិធីច្បាប់ ក្នុងអំឡុងរយៈពេល ៧ថ្ងៃ បន្ទាប់ពីប្រកាសសេចក្ដីបំភ្លឺនេះ។
